剛剛過去嘅十月份出文速度大大減慢了。原因有很多，招呼過嚟探我哋嘅屋企人，又順道陪她一齊去西班牙旅行（遊記慢慢再出，要期待喔！）。然後，瑞典文課的功課開始增加了，玩完回來當然要追課堂進度。另外，就是十月頭嘅時候，我生病了。
人人都話瑞典空氣清新，有咩病呀、敏感症狀呀，過到嚟都會不藥而癒。我嘅氣管敏感症狀反而喺搬過嚟之後加重了⋯⋯呢度天氣四季分明，每每季節交替，特別係春夏和秋冬之間，氣管因為唔能夠喺短時間內適應急劇嘅空氣濕度同溫度轉變而中招。頭一年嚟因為毫無準備，狠狠地中咗一次招。當時連續 3 晚因呼吸困難失眠，伴隨住低燒，失聲，行步路都扯曬蝦。直頭有一刻覺得自己係唔係會死㗎啦？由睇醫生到完全復完經過約兩個月後，當下真係覺得原來可以暢順地呼吸都係一種恩賜。
自始每踏入轉季時間都會做足準備，永遠比人著多件衫。儘管如此，面對早晚超過 10 度溫差，今個秋天一開始我又唔小心中咗招啦⋯⋯不過今次我醒咗啦，一覺唔對路就諗住去睇醫生啦。
由於瑞典大部份醫務所不設 walk in，大部份都要求患者預先網上/ 電話預約。於是上網睇睇最近屋企間診所，最早可預約日子竟然係6個星期後！仲要寫明拒絕 walk in。實在難以置信，等到6個星期嘅人就唔使睇醫生啦⋯⋯唉，既然係咁，唯有出市中心睇收 walk in 嘅診所啦。點知呢間 walk in 診所又話佢哋只接收曾經幫襯過佢哋嘅患者 walk in ⋯⋯ 去會所就話 members only 姐，診所都咁玩法 ? 咁樣周圍走嚟走去，時間以經去到下午，大部份診所都準備休息啦。出面北風吹吹，又落住微微雨，氣管一邊喘一邊行。最後搵到一間喺兩個鐘後先應診，而且接受診所開門前 30 分鐘電話預約。雖然又要搭多成個鐘車，但都唯有喘住條氣繼續我尋找醫生的故事啦⋯⋯
為咗可以盡早睇到醫生，我哋都好乖喺診所開門前 30 分鐘開始打電話去預約。點知電話一響就響咗 30 分鐘，一直響到診所開門，個護士嬸嬸揚手叫我哋入去，仲送咗個瑞典式幽默：「我都喺度啦，你覺得仲有冇人會聽電話呢？」講完嬸嬸自己哈哈大笑出嚟，歷時 5 小時奔波頻撲先終於睇到醫生嘅我哋就真係笑唔出啦⋯⋯
忽然諗起以前喺香港返工嘅一位上司，佢每次見到同事請病假都會講一句：「病呢啲嘢，講意志嘅姐。」當時我覺得呢位上司工作狂，病都唔俾人休息。但經歷呢個尋找醫生的故事，就有另一番體會。病咗想睇個醫生都咁艱難，病到剩低半條人命仲要頻頻撲撲大半日先見到醫生一面。喺瑞典病咗唔講意志，仲可以講咩？唔怪得瑞典打工仔啲病假一請就成個星期啦⋯⋯
Search